​

ግብርናን በዘመናዊ መንገድ ማሻሻል ከፍተኛ ቦታና ቅድሚያ የሚሰጠዉ ፕሮግራም ነዉ፡፡ ይህም የሆነበት ማክንያት የግብርና አመራረት ዘዴ ከፍተኛ መሻሻል የሚያስፈልገዉ ጉዳይ ነዉ፡፡ ምንም እንኳን ከ85 በመቶ በላይ የሚሆነዉ የኢትዮጵያ ሕዝብ በግብርና የተሰማራ ቢሆን ዉጤቱ ግን በአገር ዉስጥ ያለዉን የምግብ ፍላጎት እንኳን ሊያሞላ አልቻለም፡፡ ዘመናዊ የግብርና ዘዴዎች በስራ ላይ ከዋሉ በልዩ ልዩ የማምረቻ መሳሪያዎች እየታገዙ ጥቂት ሕዝቦች ለአገሪቱ የሚያስፈልጋት ከማሟላት ተርፈዉ ለሌሎች የሚተርፍ ምርት ማምረት ይችላል፡፡ ጥቂት ሰዎች (እንደበለጸጉት አገሮች ከ10 በመቶ የጠቅላላዉ አገር ሕዝብ) የሚያመርቱት ለግብርናዉ የኢኮኖሚ መስክ ሙሉ እንቅስቃሴና ዉጤት በቂ ኃይል ነዉ፡፡ ይህ ማለት 75 በመቶ የሚሆነዉ ሕዝብ እርሻዉን ትቶ ወደ ሌሎች የኢኮኖሚ ዘርፎች መሰማራት አለበት ማለት ነዉ፡፡ የግብርና ኢኮኖሚዉ በአጠቃላይ በሶስት ረድፎች መሻሻል ይገባዋል፡፡

​

1. እያንዳንዱ የገበሬ ቤተሰብ ለየግሉ በሁሉ ዓይነት የግብርና ዘርፍ ጥረት ከሚያደርግ ምርት በዕጥፍ ድርብ እንዲበዛ በተወሰነ ምርት ላይ ማተኮር አለበት፡፡ ይህም ማለት አንድ ገበሬ ቤት በጎች ዶሮዎች ላሞችና እርሻዉም አብሮ ከሚካሄድ አንደኛዉ ላይ ትኩረት ሰጥቶ ያንን በጥራትና በብዛት ቢያመርት የበለጠ ትርፍና ገቢ ይኖረዋል ማለት ነዉ፡፡ በተለይም ደግሞ ተባብረዉና ተደራጅተዉ የእህል አምራቾች፤ የስጋ አምራቾች፤ የዶሮ አምራቾች ሆነዉ ቢደራጁና የማምረቻ የማከፋፈያ ዘዴዎችና መዋቅሮች በሕብረት ቢገዙ ምርታቸዉ የበለጠ ይጎለምሳል ማለት ነዉ፡፡ እንደዚህ ዓይነቱ አመራረት የተትረፈረፈ ምግብ ለማምረት ይረዳል፡፡ እጥረትን ያቆማል የዋጋ ንረትን ያቆማል ሕዝቡም የተሟላ ምግብ አግኝቶ ጤናማ ህይወት በመኖር ከችግር ይገላገላል፡፡

2. ከብቶችም በማርባት ላይ የተሰማሩት በከብቶች መኖ ዉሃ እና ጤና ላይ በማተኮር በዘመናዊ ቴክኖሎጂ በመታገዝ ከከብቶች የሥጋና የወተት ዉጤታቸዉን በብዙ እጥፍ እንዲያድግ ይሆናል፡፡ ይህ ዓይነት አሰራር አላግባብ እየተጋጡ የሚሸረሸሩት የዕርሻ መሬቶች እንዲጠበቁ ያደርጋል፡፡ ከብቶች በቂ መኖ በቂ ዉሃ ሳያገኙየሚንከራተቱበት ሂደት ይቆማል፡፡ 

3. የእህል ምርትም ከመጀመሪያ እስከ መጨረሻ በጥራትና በይዘት በቴክኖሎጂ ታግዞ ብዙ ድካም በሌለበት ሁኔታ በብዛት ይመረታል፡፡

4.  ኢትዮጵያ ዉስጥ በየክፍለ ሀገሩ በተፈጥሮ በቅለዉ ሰዉ ሳይለቅማቸዉ እየወደቁና እየበሰበሱ የሚጠፉትን እንደ ማንጎ፤አቮካዶ፤ሙዝና የመሳሰሉት ፍራፍሬዎችን በሚገባ ማዳበርና ወደ ገበያ እንዲቀርቡ መደረግ ይገባዋል፡፡ በተለይም በአሁኑ ጊዜ በዓለም ገበያ የፍራፍሬ ዋጋ እየናረ በመጣበት ጊዜ ኢትዮጵያ ዉስጥም ችግር ባለበት ወቅት ፍሬዎችን ማዳበርና በሚገባ መንከባከብ ከፍተኛ የገቢ ምንጭ ይሆናል፡፤

5.  በከብት እርባታ ላይ ብቻ ተወስነዉ እንደ ወቅቱ ከብቶቻቸዉን ተከትለዉ ከቦታ ቦታ ሲንከራተቱ የሚኖሩት ህዝቦች በዘመናዊ መንገድ የከብት ርባታ በማደራጀት የተሟላና መንከራተት የሌለበት ከፍተኛ ዉጤት ያለዉ ኑሮ እንዲኖሩ መደረግ ይገባዋል፡፡

6. ተመሳሳይ የስራ ዓይነቶች በየክፍለ ሀገሩ ቢካሄዱም አንደኛዉ ክፍለ ሃገር ከሌላዉ የተለየ አስተዋጽኦ ቅድሚያና ጠቃሚ ቦታ እየተሰጠዉ በመለዋወጥና በመረዳዳት በመተጋገዝ ሁሉም በአንድ ላይ የሚያድጉበት መንገድ በመከተል የሁሉም ሕዝብ የኑሮ ደረጃ የሚያድግበትን መንገድ መከተል ያስፈልጋል፡፡

7. ለግብርናዉ የኢኮኖሚ መስክ ማደግ ዋናዉ መንገድ አሁን ያለዉ ሕብረተሰብ ወደ ኢንዱስትሪ ወደ ግንባታ፤ ንግድና የመሳሰሉት የአገልግሎት መስጫ የስራ መስኮች በፈቃደኝነት ሊሰማራ ነዉ፡፡ እነዚህ ሰዎች ሁሉ የማምረት ችሎታቸዉ በማደጉ የሚያገኙትም ገቢ በመጨመሩ የግብርና ምርቶችንም የመግዛት አቅማቸው ይጨምራል፡፡ የግብርና ዉጤት አይነትና ጥራትም በአስተማማኝና በአኩሪ ደረጃ ያድጋል፡፡

8. ለማጠቃለልም የግብርና ፕሮግራም ዋና ዋና ግቦች የሚከተሉት ናቸዉ፡፡

• በብዙ እጥፍ የግብርና ምርት ማሳደግ ለዚህም ዘመናዊና የተፈጥሮ መንገዶችን በስራ ማዋል፡፡ ለአገር ዉስጥ በሙሉ የሚበቃ ማምረት ትርፍንም ለዉጭ መሸጥ ዉጤቶች/ዕድሎች የምርት መጎልመስና ብዙ ገንዘብ ማግኘት የተለዩና ጥራት ያላቸዉ ሰብሎች ማምረት ሰፋ ያለም ምርጫ ማምረት የተመላ ኑሮ መኖር

• አግሮ ኢንዱስትሪዎችን በስራ ላይ በማዋል የሚመረቱት ምርቶች ለሕዝብ በበለጠ ተሻሽለዉና ተሰናድተው እንዲቀርቡ ማድረግ ፡፡በአጭር ጊዜ እንዳይበላሹ መንከባከብ

• በግብርና የተሰማሩት ሰዎች ገቢ በሌላ ስራ ላይ ከተሰማሩት ጋር እንዲመጣጠን ማበረታታት

• ብልሽትና ጥፋት እንዲቀንስ ወይም እንዲጠፋ ቀጣይነትና የሚታደሱ የሐይል መስጫዎችንና ዕቃዎችን መጠቀም፡፡